ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានសម្តែងការហួសចិត្តចំពោះការយកប្រធានបទជំនន់ទឹកភ្លៀងនៅកម្ពុជាមកវាយប្រហាររាជរដ្ឋាភិបាលកម្ពុជា ដោយឡែកជំនន់ទឹកភ្លៀងដែលកំពុងវាយប្រហារនៅអាមេរិក និងអឺរ៉ុបបែរជាគ្មានអ្នកវាយប្រហារទៅវិញ។

សម្តេចតេជោបានសរសេរនៅក្នុងបណ្តោញសង្គម Twitter ដោយភ្ជាប់ជាមួយនឹងរូបថតសម្តេចហែលទឹកកម្សាន្តលេងនៅខេត្តព្រះសីហនុដូច្នេះថា៖ «ជំនន់ទឹកភ្លៀងកំពុងវាយប្រហារយ៉ាងខ្លាំងនៅអាមេរិក និងអឺរ៉ុប ដូចអត់មានអ្នកនិយាយ។ ចម្លែកនៅស្រុកខ្មែរភ្លៀងធ្លាក់កម្រិត ១៥៣មីល្លីម៉ែត្រមិនធ្លាប់មានបែរជានាំគ្នាធ្វើជាប្រធានបទវាយប្រហាររាជរដ្ឋាភិបាល»។

គួររំលឹកថា កាលពីថ្ងៃទី០៣ ខែកក្កដា ឆ្នាំ២០២៣ នៅទីក្រុងភ្នំពេញគ្របដណ្តប់ដោយជំនន់ទឹកភ្លៀងដែលមានកម្ពស់រហូតដល់ ១៥៣មីលីម៉ែត្រដែលកម្ពស់ទឹកជំនន់នេះគឺមិនធ្លាប់មាននៅរយៈពេល ៣ឆ្នាំចុងក្រោយនេះ បណ្តាលឱ្យលិចផ្ទះពលរដ្ឋ ហើយពលរដ្ឋដែលមានផ្ទះនៅក្បែរប្រឡាយលូទឹកស្អុយក៏រងផលប៉ះពាល់ធ្ងន់ធ្ងរផងដែរ។ ជំនន់ទឹកភ្លៀងនៅថ្ងៃនោះក៏បង្កើតបានជាប្រធានបទដ៏ក្តៅគគុក ដោយពលរដ្ឋខ្លះបានបន្ទោសទៅរាជរដ្ឋាភិបាលថាមូលហេតុដែលបណ្តាលឱ្យទឹកជន់លិចទីក្រុងនេះគឺបណ្តាលមកពីលុបបឹងនានានៅរាជធានីភ្នំពេញ។

ប៉ុន្តែយ៉ាងណានៅប៉ុន្មាន ៣ទៅ ៤ម៉ោងក្រោយបន្ទាប់ពីរាំងភ្លៀង រដ្ឋបាលរាជធានីភ្នំពេញក៏បានរំដោះទឹកចេញពីទីក្រុង និងបានកាយសំរាមនៅតាមមាត់លូនៅតាមខណ្ឌទាំង១៤។ ក្រោយពីមានជំនន់ទឹកភ្លៀង អាជ្ញាធរតាមខណ្ឌនីមួយៗក៏បានចេញរថយន្តលាងសំអាតផ្លូវដែលរងការជន់លិចដោយសារទឹកភ្លៀង៕